Líamos ontem na imprensa zómbica que uma moça camarinhana de 19 anos, Vanessa Blanco Castro, que mora em Delémont (Suíça), aspira a conquistar o título de Miss Jura, o seu cantom de residência.

Contradizendo um pouco o Castelao, que dizia aquilo de que "Os concursos de vacas leiteiras valem mais que os concursos de beleza", na redacçom de SOQNF nom temos reparo em admitir que acompanhamos com expectaçom este tipo de certames e apoiamos a beleza autóctone (misses, misters e o que vinher) incondicionalmente. Já temos reivindicado nestas páginas a icónica figura da Emilia Docet, a Miss Espanha que berrou "Galiza ceive!". E, sem recuarmos tanto no tempo, felicitamos a Estíbaliz Pereira, que triunfou no concurso pequeno-imperial do passado ano, apesar de que os seus galeguíssimos "depende" alporizavam a canalhesca espanhola.

Com estes antecedentes, tínhamos a melhor disposiçom para organizar uma campanha de apoio à candidata emigrante na sua justa lide frente às belezas etnicamente jurássicas (desculpem lá se este nom é o gentílico certo para o cantom de Jura), máxime nesta altura histórica em que a Confederaçom Helvética parece caminhar para uma institucionalizaçom da xenofobia. Porém, devemos reconhecer que nos descorajou bastante a fotografia da Vane envolta na bandeira do Império Pequeno que seica tem no book. Sentimo-lo, querida, mas assim nom vamos no teu carro à missa. Aguardamos que rectifiques para o próximo Camarinhas Beauty.

No passado dia 22, depois da histórica manifestaçom que conseguiu ateigar a Praça do Obradoiro em defesa do galego, o jornal da capital pequeno-imperial 'La Razón' surpreendia próprios e estranhos com umha estrambótica capa em que dous indivíduos de escuro faziam umha fogata com um trapo de cores cálidas.

Já referimos aqui as surpreendentes conclusons da investigaçom policial a respeito da identidade dos indivíduos em questom. O que ainda nom dixemos, e que fontes de sobrada solvência nos confirmam, é que o jornal madrileno tinha prontas várias capas antes de se decidir pola da bandeirinha.

A seguir oferecemos umha escolha das fotos que o jornal baralhava para a capa de dia 22. Como é costume, cliquem na imagem para alargá-la.

Leia mais »