Em dezembro do ano passado umha equipa de investigaçom de Sei O Que Nos Figestes... deslocava-se a Mondonhedo e regressava aos seus quarteis de inverno cumha sensacional exclusiva, a localizaçom exata da sepultura do Marechal Pardo de Cela e de Pedro Miranda, seu filho.

Em 17 de dezembro do ano passado, coincidindo com o 525º aniversário da decapitaçom de Pardo de Cela (e do seu filho), num artigo intitulado Onde estás, cabeçom? Temos a resposta!, fazíamos pública a descoberta e denunciávamos o lamentável estado em que se encontrava e encontra a sepultura:

A lápide, que reclama uma urgente restauraçom [vejam se nom], pode visitar-se na nave lateral direita da catedral de Mondonhedo, justo defronte à porta da capela do Santissimo Sacramento, mais conhecida como capela da Virgem Inglesa [V. Planta]. Normalmente, está tapada polo banco da primeira foto [ei-la] e carece de qualquer sinalizaçom. Uma boa metáfora de 525 anos de doma e castraçom.

Por isso, 525+1 anos e 1 dia depois da execuçom do Marechal, de Sei O Que Nos Figestes... Nos Últimos 525 Anos reivindicamos o imediato translado dos restos do Marechal Dom Pedro Pardo de Cela da Catedral de Mondonhedo ao Panteom dos Galegos Ilustres, na compostelana Igreja do convento de Sam Domingos de Bonaval (total, para o caso que lhe fazem alá).

Mas queremos que vós, nobres leitores e leitoras deste blogue, nos deades umha forcinha em tam justa reivindicaçom. Como? Pois enviando as vossas cartas, cartões postais, faxes e/ou correios eletrónicos para a Diocese de Mondonhedo-Ferrol e para o Patronato Rosalia de Castro (reconvertido em Fundaçom Rosalia de Castro e responsável pola manutençom de tam galego e ilustre Panteom) fazendo vossa a nossa petiçom.

Fundaçom Rosalia de Castro
Casa-Museu Rosalia de Castro
A Matança
15917 Padrom
Tlf: 981 811 204
Fax: 981 811 294
casamuseo@fundacionrosaliadecastro.es

Diocese de Mondonhedo-Ferrol
Praça da Catedral, 1
27740 Mondoñedo
Tlf: 982 521 006
Fax: 982 521 156
mcs@mondonedoferrol.org

Ontem foi 28 de Junho, Dia do Orgulho Gay. Ontem também foi domingo assim que os de Sei O Que Nos Figestes... andávamos meio off-line.

Por este motivo, ignorando a sábia recomendaçom do provérbio popular (nom deixes para amanhã o que podes fazer hoje) de SOQNF decidimos deixar para hoje segunda-feira o que podíamos ter feito ontem domingo de termos sacrificado o sacrossanto descanso dominical.

E é que no dia de ontem, domingo 28 de Junho, comemorava-se o aniversário de duas sonadas cargas policiais. 40º aniversário da carga policial de Stonewall e 25º aniversário da de Bonaval.

Em 28 de Junho de 1969 a polícia de Nova Iorque carregava contra os fregueses do Stonewall Inn (Christopher Street, Manhattan, NY) dando origem à chamada Rebeliom de Stonewall e, com a passagem do tempo, a todas as comemorações do Dia do Orgulho Gay.

No Dia do Orgulho Gay de 1984 a polícia espanhola (a.k.a. la madera) carregava contra a multidom concentrada em Bonaval em sinal de protesto contra a polémica translaçom (do Panteom do Centro Galego no bonaerense cemitério de La Chacarita ao Panteom de Galegos Ilustres na compostelana Igreja de Sam Domingos de Bonaval) dos restos de Afonso R. Castelao.

O polémico translado dos restos de Castelao implementou-se coincidindo com o 48º aniversário do plebiscito do primeiro Estatuto de Autonomia de Galiza, celebrado em 1936 no Dia do Orgulho Gay.

E 25 anos depois a polémica ainda continua. Recentemente Xavier Cordal e Camilo Nogueira polemizaram sobre o assunto nas páginas do jornal Galicia Hoxe (art. X.C., réplica C.N., contra-réplica X.C.).