Estes dias está a ter muito sucesso nos Països a cançom Jenifer dum grupo de gente nova chamado de Els Catarres que ademais de apostarem por um modelo de distribuiçom de conteúdos nom dependente dos selos de gravaçom ao permitirem descarregar toda a sua música desde a sua página web têm publicado recentemente umha cançom mui divertida e até ridiculista. A sua referência aos tópicos do soberanismo catalam e ao "amor impossível" entre um raparigo comprometido com o país e umha "choni" de Castelldefels deu acadado o coraçom e os ouvidos de muita gente na Internete. Nom fai falha dizer que em Sei o que nos Figestes... gostamos imenso e rimos a esgalha com o tema -quem escreve estas linhas nom da parado de cantarolar o retrouso- e que incluímos para o vosso gozo:

Porem desde a primeira vez que escutamos a cançom assaltaram-nos duas sensaçons. A primeira delas foi que estaríamos encantados de ver algum dos muitos e excelentes grupos pop que figeram pop!&notspot no país nos últimos anos compor umha cançom sobre o duro que tem de ser para algum setores do soberanismo galego apresentar o campanheiro ou companheira "pouco consciente" em segundo que ambientes. Seria mui engraçado escutar o embaraço de levar jantar na romaria do 25 (seja a da Carvalheira de Sam Lourenço, for qualquer outra das organizadas polo independentismo) a moça da que um namorou saindo pola Corunha sem reparar até o dia seguinte em que era mais de Juan Flórez que El Pote. Ou os sentimentos contraditórios dalgumha militante quanto tem que apresentar o namorado que nom entende mui bem exatamente o que é que é isso dos Coentros Sociais.... convidamos ao artisteio para que trabalhe no conceito, nós também ceivamos as idéias para que germolem. Com todo também tinhamos outra impresom: que algo assim, algo sobre o choque de culturas na Galiza numha história de amor impossível já escutaramos nalgum momento. Demorou pouco tempo até que reparamos que Os Diplomáticos de Monte Alto já contaram o clash of civilizations entre um rapaz "de monte" e umha rapariga "urbanita" na sua magnífica "Esta noite hei dir alo", que também deixamos cá para desfrute de todos: