Após um meti(li)culoso trabalho da nossa equipa de investigaçom, há pouco mais dum mês o companheiro Marinhas dava a sensacional exclusiva de que o pai, o avô e os tios da Gloria Lago (presidente de Galicia Bilingüe) foram condenados no célebre 'caso do metílico', um envenenamento em massa que abalou Galiza na década de sessenta do século passado.

Vamos agora meter o turbo da máquina do tempo e viajar a 1916, quando a família Lago ainda estava na primeira fase da sua gloriosa tradiçom intoxicadora (primeiro foi etílica, logo metílica e actualmente ética). Devemos a presente gourmandise ao blogastrónomo Manuel Gago e ao académico da RAG Xosé Luis Axeitos:

Esta garrafa de vintage chamou a atençom do Axeitos polos seus valores literários e a do Gago polo seu interesse enográfico. Para nós, porém, tem o morbo de ser um produto da destilaria viguesa Lago e Hijos, Ltd., que naquela altura baptizava o seu melhor vinho com o nome da grande poeta Rosalia de Castro a e o contra-etiquetava com um famoso texto de Cantares Gallegos, quando nom havia Norma que obrigasse. Nom nos custa nada imaginar o António Villar Ponte a brindar com um copo deste vinho pola fundaçom das Irmandades da Fala!

Mas a cousa nom para aqui. Também graças ao Gago, companheiro nas tarefas informativas, soubemos da conexom oculta entre Gloria Lago e Norma Duval, umha outra musa do Partido Popular e mito erótico pequeno-imperial:

Segundo o pai de Manuel Gago, "a saga e a riqueza dos fillos de Lago rematou, disque, cando un herdeiro enfermizo da familia casou [com a] cupletista". Contrastando fontes, inteiramo-nos de que tal casamento nom se chegou a produzir, porque a família Lago se opunha a que a vedette continuasse com a sua exitosa carreira profissional após contraído matrimónio. O ex-prometido de Norma Duval e suposto primo de Gloria Lago, chamado Jorge García Lago, faleceu em 1982, à idade de trinta e dous anos.