Com estupor, soubémos a notícia de que todos os membros da corporaçom de Vimianço (pertencentes a PP, PSOE e BNG) vestírom no Pleno camisolas de apoio a Eva Freire, a vizinha do município que participou (e o tempo verbal pretérito justifica-se porque já foi expulsa) na presente ediçom do programa Gran Hermano, da televisom pequeno-imperial Telecinco.

Os ínclitos munícipes, presididos polo alcalde Alejandro Rodríguez, pediam também à vizinhança que apoiasse com os seus votos telefónicos a concursante, que na altura já estava nominada para "abandonar la casa". Freire é umha ganadeira da freguesia de Baínhas que ao comentário "Casi no tienes acento gallego" responde com um orgulhoso "¡Gracias!".

Este atitude contrasta grandemente com a dumha outra jovem concursante galega num reality show, infelizmente muito menos conhecida. Referimo-nos a Ana Palomo, ou simplesmente Ana, filha de emigrantes em Bruxelas que nos deleitou com esta sentida interpretaçom dumha cançom de berço galega no Star Academy 8, da televisom francesa TF1:

[Nota: o vídeo já nom está disponível no YouTube, mas um benefactor anónimo subiu-no ao Dailymotion e também aqui, para poderde-lo guardar nos vossos computadores]

Quem nom se emocione com isto, é que nom tem coraçom. Como nós vamos sobrados de ventrículos e aurículas, somamo-nos à iniciativa de Diogo no Chuza! e requerimos formalmente os deputados e deputadas do Parlamento Galego para que suem um pouco a camiseta e, na próxima reuniom da Comissom de Emigraçom, aprovem umha moçom de apoio à Ana, digna embaixadora da nossa língua e a nossa música no universo francófono.

Igualmente, acabamos de ligar para Xosé Manuel Piñeiro, no intuito de que no seu programa Acompáñenos, que é o mais parecido a um programa do coraçom que tem a TVG, faga um acompanhamento diário da trajectória da Ana no Star Academy. Manteremos-vos informados sobre os resultados destas gestons.

Parce qu'elle le vaut bien!

Leia mais »