A vizinhança de Valença do Minho quer sanidade pública como é devido ou, ao menos, que se pareça um pouco com a que há em Tui. E para reclamarem-no, nom se lhes ocorreu nada melhor do que utilizarem bandeiras espanholas como emblema do seu protesto.

Haverá que pense, como o jornalista Carlos F. Amado, que teria sido melhor utilizarem bandeiras galegas... e até poderíamos concordar.

Mas o objectivo deste tipo de acções nom é tanto procurar simpatias com os vizinhos de acima como zangar os governantes. Imaginem um protesto similar na Galiza: o que zangaria mais as autoridades espanholas, que se pendurassem bandeiras asturianas das casas ou bandeiras de Portugal? Pois isso.

Na redacçom deste humilde blogue consta-nos que as valencianas e valencianos nom pretendiam com esta actuaçom ferir sensibilidades galizianas, nem muito menos. Boa prova é que, se lhes deixam, mesmo fazem os seus pinheirinhos com o galego ILG-RAG. Que nom acreditam? Olhem só este estarrecedor depoimento que recolhemos de um conhecido jornal corunhês:

Banderas españolas cuelgan de las ventanas de un edificio de viviendas de Valença do Miño. Piedad asegura una con cinta de embalar. Para que no la lleve el viento. «É polas urxencias. En agradecemento aos españois que nos ofreceron a súa sanidade. Porque o alcalde de Tui dixo na tele que calquera paciente sería ben atendido alí», grita desde lo alto.

Pois. O primeiro é usar bandeiras espanholas. O segundo, passar ao galego com ortografia espanhola. O terceiro, quem sabe, mudar o escudo da Câmara ;-)

Brincadeiras à parte, acontecimentos como este é habitual que evoquem recorrentemente a mesma pergunta. Pergunta que ninguém formulou tam bem como o Mestre.

NA VEIRA DO MIÑO
- E os da banda d'alá son máis estranxeiros que os de Madrí?
(Non se soubo o que lle respondeu o vello)

Nós, porém, sim que o sabemos ;-)