A pregunta lançada ao ar por um cidadao anónimo no dia de ontem provocou umha autêntica reacçom em cadeia e desatou umha autêntica maré rojigualda de solidariedade ridicul(ar)ista.

Na manhá de ontem, quarta-feira 15 de Outubro de 2008, um tal O’Sanma enviava ao Chuça umha notícia intitulada O 'Foro de Ermua' soma-se à manifestaçom do domingo na Corunha. Nela dava conta do apoio exprimido polo dito batalhom literário basco-espanhol à manifestaçom convocada pola Mesa Por La Libertad Lingüística na Corunha para este domingo. No breve texto de apresentaçom à notícia O’Sanma deixava cair a seguinte pergunta:

A que esperam @s Mil Filh@s de Pita , a Mesa Contra el Libertinaje Lingüístico e Tan Gallego Como El Gazpacho para fazerem o mesmo?

Apenas duas horas e dez minutos mais tarde umha tal Lourixe deixava um comentário avisando O’Sanma de que a sua pergunta já tinha sido respondida.

A resposta encontrava-se ao abrir o enlace que a Lourixe colocara no seu comentário e que levava a umha outra história, enviada ao Chuça por ela própria, intitulada O Gazpacho renace para se unir á convocatoria pola Libertad Lingüística do domingo na Coruña. No texto introdutório da sua história a Lourixe dizia:

Respondendo á chamada de osanma, tangallegocomoelgazpacho proclama: No podemos seguir callados.

Com efeito, a organizaçom ridicul(ar)ista Tan gallego como el gazpacho tinha renascido das suas cinzas, por acaso ou nom, muito pouco depois de lançar a sua pergunta O’Sanma.

6 horas e 45 minutos após enviada por Lourixe (e apenas 4 horas após publicada) a notícia de tam oportuna ressurreiçom de TGCG acumulava já 30 comentários e 47 chuçadas! Em vista da boa acolhida semelha que O’Sanma nom era o único que a esperava!

Na manhá de hoje, quinta-feira 16 de Outubro, é a também ridicul(ar)ista Mesa Contra El Libertinaje Lingüístico (MCLL) a que adere a convocatória da Mesa Por La Libertad Lingüística (MLL) seguindo, segundo dim, a esteira de “organizaciones tan serias como son el Foro Ermua y Tan gallego como el gazpacho”.

Pode estar contente O’Sanma. Só falta que agora adiram @s Mil Filh@s de Pita para que a sua dita seja completa!