Duas semanas e três dias após 25 de abril, sempre... on the road! eis Suspiros de Espanha o segundo exclusivo da nossa correspondente nos Països Polacs, Lucy Ewing, para Seioque.com

A minha garganta funda, e falo em sentido figurado (eh, marraos!) confessou-me que no ano 2003 o recentemente elegido presidente blaugrana Joan Laporta, esquivou-se de ir ao enterro do finado Manoel Vázquez Montalbán, escritor barcelonês em espanhol, cronista da gauche divine e culé rematado, porque temia assistir a umha despedida com certa caspa.

E efetivamente, como sempre o Grande Jan acertou. Momentos antes de ser retirado o féretro, exposto no pomposo paraninfo da UB, soou Suspiros de España. Todo um clássico cañí que evoca a saudade da pátria hispana que se vai. Nom sei se foi a derradeira vontade do criador do detetive galaico-catalám Pepe Carvalho, mas quem o decidiu cobriu-se de glória. Umha cançom das Dirty Cheacks nom teria ficado pior.

A caspa é um resíduo cutâneo-capilar muito caprichoso que às vezes chega às cacholas mais saneadas e lá onde o H&S semelha que sobraria é onde resulta que fai mais falta. Evidentemente nom falo da minha lustrosa cabeleira, nem de nengumha outra. Volto a falar, para que se me entenda, em sentido figurado. E concretamente me refiro à nova campanha aparecida oportunamente com motivo dos mundiais de futebol da África do Sul, onde o Império Pequeno, a diferença do britânico, detenta o monopólio da bola.

A campanha encabeça-a o lema em espanhol (deve ser para toda Espanha...): Vuestras lágrimas son nuestras risas. Rodea um círculo com umha cara pintada de amarelo e vermelho, e olhos que choram a lágrima viva. A campanha anima a botar foguetes quando umha equipa marque golo ao Casillas. Inspirando-se, suponho, no método do Dr. Cat da petardoterapia, eliminamos o mau rolho que nos provoca a muitos/as, sentir a alegria espanholista em própria colónia. Também é umha maneira de contra-arrestar também a petardomania que desencadearám as vitórias rojigualdas.

A ideia nom é nova mas passa. Nom mata em originalidade, mas visto que a petardoterapia se começa aplicando em casos fáceis e recuperáveis, já vai bem apontar para o futebol. Umha outra cousa é a parte gráfica. I aqui a caspa sim que arrota como o alho. De entrada o lema margina os outros idiomas peninsulares. Segundo, o logo é umha carota infantiloide e mal feita. E para rematar o tema, a estanqueira: E nós, as pobre vítimas fotosensíveis quê? Nom sabem os benditos impulsores da campanha que existe a síndroma de Intoxicaçom Cromática Obtusa (SICO) também conhecida como síndroma dos Mundiais? Um primeiro caso já se diagnosticou no Mundial'78 da Argentina. O afetado foi Jorge-Alberto d'Amore, um dissidente argentino da ditadura de Videla. Desde aquele caso, a síndroma albiceleste, nome polo que é conhecida a SICO na América do Sul, por analogia com a bandeira argentina, já está tipificada pola OMMS como umha irritaçom do nervo ótico que aparece quando este se sobre-expom à irradiaçom provocada pola manipulaçom política dumha bandeira de desenho medíocre sobre umha populaçom subjugada. Como se nom tivéssemos avondo com a que cairá!

Em resumo, a minha sugestom aos com certeza bem-intencionados impulsores da campanha das lágrimas e as salvas de fogos é que tirem as cores pátrias suas ou que por caspa, se acaso: duas taças. E incorporem à campanha a mascote do Mundial'82, manipulada como poucas. Umha figura valenciana, e polo tanto, catalana, que ainda procura a libertade. Que quando era repetidamente espancada enquanto se lhe perguntava como se chamava, respondia: "Jo no em dic Narankhito. El meu nom és Taronget" [“Eu nom me chamo Naranghito. O meu nome é Taronget (Laranjinho)”].